Pour komemor semenn enternasyonal lalektir , bann ekriven ek piblik an zeneral ti ganny sans asiste dezyenm aktivite lo kalandriye Lenstiti Kreol.  Sa ti Sware Lektir ki ti fer le 29 Avril  2011 kot Lenstiti Kreol Au Cap.  Parmi lezot aktivite ki ti lo progranm pour sa sware ti lansman de nouvo liv anba  tit “I dan liv lavi”  ekrir par Noella Baker ek en dezyenm volim “Lantolozi poenm Seselwa”  . Bi lansman sa de liv se pour ankouraz lalektir an Kreol e valoriz ankor plis nou leritaz kiltirel atraver  bann tel louvraz.  Lenstiti Kreol I swete ki lansman sa de nouvo liv I ava en lenspirasyon  pour bann zenn ekriven. 

Lo progranm sa swar ti osi annan partisipasyon bann ganyan Konkour Pri Antoine Abel  pour lannen 2008 – 2010, kot bann ganyan ti lir serten ekstre zot maniskri e sa ti swiv par diferan rakontaz  ek resital.

Lenstiti Kreol i annan plezir prezant zot en ekstre tire dan “I dan liv lavi”.

Andre ti antre byen tar se li, parey son labitid. Son madanm Alis ti regard lo revey; set er ti’n sonnen lontan e wit er ti pe vini dousman dousman.  Alis ti pe asiz lo son sofa prefere, sa enn ki ti an fas avek zot portre maryaz lo divayder. Ou ti a mazinen ki Andre ti a fer krwar i fer en zefor pour vin en mari ek papa pli atantif.

Not lo loter

Noella Baker i orizinelman en zabitan Anse Boileau. I’n fer tou son letid segonder Anse Boileau, e swivan sa, i’n swiv son letid pos-segonder Lekol Politeknik ek Lenstiti Nasyonal pour Ledikasyon. Noella in al fer son letid tersyer Lafrans, kot in ganny en degre dan Ledikasyon. Konmela, Noella i travay avek SBC koman en realizater. Sa rekey zistwar kourt i premye liv ki Noella pe pibliye avek Lenstiti Kreol.