Lokasyon>>
 Paz Prensipal : Moutya
|
|
Moutya
|
Tradisyon Oral dan kiltir Seselwa
Isi Sesel, kan nou koz lo tradisyon oral, nou pe souvan fer referans avek bann rakontaz ek zedmo oubyen sanson ek lanmizik ki’n sorti kot en zenerasyon pour al kot en lot atraver letan, depi ou menm apre ki bann premye zabitan ti etabli zot Sainte Anne an 1770.
Serten parmi nou bann tradisyon oral i annan zot lorizin dan sa lepok; setadir zot ti konmans avek premye zabitan, me serten karakter ek konteni in evolye avek letan, tandis ki lezot in ganny entrodwir pli tar avek larive bann lesklav libere osi byen ki lezot imigran parey bann Endyen, Sinwan ek Angle.
Nou annan konman legzanp bann kont ek lezann, parmi lekel i annan ki depikte bann siperstisyon atase avek serten fenomenn natirel dan zistwar Sesel (War Georgine Robert, 1999). Nou osi annan bann zistwar parey Soungoula (War Choppy ek Salomon, 2004), en karakter Afirken ki’n byen entegre li e ki’n evolye dan kiltir Seselwa. Serten lezot karakter tel ki Pti Zan in plito reste statik dan zot versyon orizinal.
Nouvo zenerasyon Seselwa in kontribye en kantite anver nou tradisyon oral. Alor sa bann rakontaz oubyen sanson ekst. pa neseserman date depi dezyenm lanmwatye dizwityenm syek letan ki sivilizasyon Seselwa ti konmanse.
Enn parmi nou bann tradisyon oral anver ki nouvo zenerasyon in kontribye bokou i moutya. I annan telman sanson moutya ki zot parol i refer a en Sesel pli modern ki bann serser i war li difisil pour dir egzakteman kan dimoun ti konmans sant moutya. Anfet, set a moutya ki sa travay i konsakre.
|
Telesarz dokiman konplet lo Moutya
|
|