Lokasyon>>
 Paz Prensipal : Gramer Kreol
|
|
Gramer Kreol Seselwa
|
Lentrodiksyon
Sa Gramer i annan pour bi ed bann ansennyan langaz ensi ki lezot dimoun ki annan lentere spesyal dan lalang Kreol Seselwa:
- konpran pli byen striktir ek fonksyonnman Kreol Seselwa.
- ansenny zot zelev pli byen nou premye lalang.
- fasilit laprantisaz ek lansennyman sa de lezot lalang nasyonal (Angle / Franse) an itilizan konesans premye lalang.
Bann sours sa louvraz i « The Seychelles Creole Grammar » par Chris Corne, « Le Créole Français des Seychelles » par Annegret Bollée, « Laranzman nou bann fraz ek klasman nou bann mo » par Laureena Barbé, e « Lortograf Kreol Seselwa – Nou bann mo » par Marie-Thérèse Choppy.
Sa bann serser in baz zot deskripsyon lo lanaliz bann korpous ensi ki lanrezistreman bann entervi ki zot in fer. I annan bann enforman ki koz zis Kreol, bann ki bileng ouswa trileng. Zot in osi baz zot deskripsyon lo zot leksperyans apre bokou lannen lansennyman langaz ek travay pedagozik pour lansennyman Kreol.
Depi ki Kreol Seselwa in ganny plis itilize dan lansennyman, dan medya, dan bann sityasyon formel ouswa kreativ in annan serten devlopman dan lizaz, par egzanp:
- plis mo Angle in antre dan Kreol Seselwa.
- laform pasiv ‘ganny’ in vin pli komen dan bann raportaz.
Komite Nasyonal Lalang Kreol, ki en komite teknik dan Lenstiti Kreol, in pran desizyon pour retir serten lenkonsistans dan fason ekrir Kreol Seselwa. Sa bann sanzman i dan Sapit 2 sa louvraz.
Sa louvraz i dekrir K.S dan en stil osi senp ki posib. I annan ankor resers pour fer sirtou dan sa ki konsern litilizasyon K.S dan bann lokazyon ofisyel. En sizesyon posib se depouyman bann korpous ofisyel.
En lot size se lanaliz bann resi ouswa rakontaz. I annan en konsta ki dan K.S, bann resi i komans dan tan pase zis pour lentrodiksyon, me apre zot kontiny dan tan prezan.
Leg : « Alors en zour, ti annan en madanm ki ti annan de garson. Tou le zour, sa madanm i al dan bwa pour al rod dibwa. »
Kestyon pour plis resers :
- Ki mannyer rakontaz i striktire dan bann nouvo teks literer ?
- Ki mannyer en deskripsyon i striktire dan K.S ?
- Ki mannyer en leksplikasyon syantifik i striktire dan K.S ? (par egzanp koz lo Sida)
Sa bann nouvo teks i merit ganny analize.
Sa louvraz i ava permet ankor plis dimoun aprofondi zot konesans dan Kreol Seselwa e ava labaz pour plis resers.
Pour ganny plis lenformasyon kontakte lofis Lenstiti Kreol lo ladres swivan.
Lenstiti Kreol
Au Cap
Mahé
Seychelles
Tel : 376351 / 376352
Faks : 376286
Klik pou lir Dokiman konplet |
|
|