Pri Antoine Abel ti relanse an Oktob 2007 koman en konkour literer nasyonal pour ankouraz e promouvwar prodiksyon literer an Kreol dan Sesel. En tel konkour in deza organize avan, me i pa’n lo en baz regilye. Lenstiti Kreol i swete ofer bann ekriven literatir Kreol sa loportinite tou le de-z-an. Donk, an 2008, 3enm edisyon ti lanse pour komemor 25enm Festival Kreol Sesel an Oktob, 2010. Sa enn edisyon ti ouver dan tou kategori literer, avek bi ki i a vin vreman en konkour nasyonal ki konpri tou disiplin lekritir.

Bann lorea konkour ti ganny zot pri pandan seremoni VOYAZ, le 28 Oktob 2010, dan prezans Msye Vincent Meriton, Minis pour Devlopman Kominoter, Lazenes ek Sport, osi Minis Dezinyen e Tyermenn Komite Festival Kreol, Msye Bernard Sham-Laye, Minis pour Devlopman Sosyal ek Kiltir, Mm. Macsuzy Mondon, Minis pour Ledikasyon, Lanplwa ek Devlopman Resours Imen. Osi prezan ti Mzel. Caroline Abel ek Mzel. Francesca Abel pour reprezant lafanmir Abel, e zot ti fer nou loner prezant en pri.

Pri ki bann lorea i ganny ofer i koumsa:

Gran Pri: SR30,000.00

Premye Pri dan tou kategori: SR20,000.00

Dezyenm Pri dan tou kategori: SR10,000.00

Trwazyenm Pri dan tou kategori: SR5,000.00

GRAN PRI

Pour lannen 2010, ziri pa’n akord en Gran Pri.

KATEGORI ROMAN

Premye Pri: Benediste Hoareau pour son roman ‘Laverite Devan Deryer’.

Ziri pa’n akord en dezyen pri ek trwazyenm pri.

KATEGORI ZISTRWAR KOURT

Premye Pri: Marie-Claire Elizabeth, pour son zistrwar ‘Lesans, Mansonz, Desepsyon’.

Dezyenm Pri: Effie Currell pour son rekey zistrwar, ‘Bann Pti Morso Paradi’.

Trwazyenm Pri: Roland Adelaide, pour son zistrwar, ‘Lapwent Souvenir’.

Mansyon Spesyal: Christina Estico pour son zistrwar ‘En Dezyenm Lanmour’

                                e Lina Cecile Hoareau pour son zistrwar ‘Trimouse Lavi’.

KATEGORI POEZI

Premye Pri: Ruth Marie, pour son rekey ‘Tou sa bann Leokri dan mon Lespri’.

Dezyenm Pri: Marie Clarisse pour son rekey, ‘Valer Sa Ki Nou Ete’.

Trwazyenm Pri: Reuban Lespoir, pour son rekey, ‘Silans I Apel Mwan’.

Mansyon Spesyal: Georgine Robert pour son rekey ‘Poenm pour Tou Laz’.

KATEGORI TRADIKSYON

Premye Pri: Georgine Robert, pour tradiksyon ‘Animal Farm’par George Orwell, anba tit ‘Laferm Zannimo’.

Dezyenm Pri: Marie-Thérèse Choppy, pour tradiksyon ‘Waiting For Godot’ par Samuel Beckett, anba tit ‘Pe Esper Godo’.

Trwazyenm Pri: Lorina Barbé, pour tradiksyon en rekey kont sorti dan diferan kiltir dan kontinan Lerop, Lafrik ek Lazi.

KATEGORI TEAT

Ziri pa’n akord okenn pri pour kategori Teat.