Msye Antoine Abel ti ne le 27 Novanm 1934 dan distrik Anse Boileau. Apre son letid primer i ti aprann mason me abandonnen pour vin en ansennyan.

Msye Abel ti al pourswiv son letid avanse kot liniversite “Reading” Langleter kot i ti kalifye dan lasyans ledikasyon. I ti vin ansenny bann zanfan lekol Anse Boileau lagrikiltir, apre sa i ti al swiv en lot staz liniversite “Bristol” pour prepar li pour donn formasyon bann ansennyan kot l'Ecole Normale Supérieure de Victoria, “Teacher Training Centre”. Msye Abel in travay dan ledikasyon ek lakiltir ziska i ti pran son retret an 1986.

Msye Abel ti premye Seselwa pour anmenn kiltir ek literatir Kreol lo lasenn enternasyonal avek son liv Paille en queue an 1969. An 1977 en koleksyon zistwar ek poenm ti ganny pibliye enternasyonalman e an 1979 i ti ganny onore avek ‘Prix de Mascareignes’ par gouvernman Franse pour son piblikasyon ‘Une tortue se rappelle’. Msye Abel ti osi pibliy en pyes apele ‘Restan Kanmira’ an 1980.

Serten maniskri ki koni par bann serk literer Sesel, me ki pa ankor pibliye i enkli en roman apele ‘Carcassaille’ ek en koleksyon poenm lo laflor ek lafón Sesel. Msye Abel in osi partaz bokou konesans ansestral atraver bann teks ek kozri lo erbalizm, larsitektir tradisyonnel, eks. Msye Abel ki ti mor le 19 Oktob 2004 a laz 70 an.