PREFAS

 

Leksik Kreol Seselwa, dezyenm edisyon i en dokiman ki bann itilizater Kreol ti pe espere depi lontan, sirtou dan domenn ledikasyon ek serten lorganizasyon Servis Piblik.  Nou oule port a latansyon bann itilizater ki sa dezyenm volim i annan serten sanzman lortograf ki i neseser note, baze lo desizyon pran par Komite Nasyonal Lalang Kreol.  Lizaz tredinyon ek lortograf bann mo konpoze i sa domenn mazer kot in annan sanzman.  Me zeneralman, bann lareg granmer i ankor parey e Komite i konsidere ki bann sanzman ki i’n fer i a fasilit lansennyman ek laprantisaz granmer dan tou domenn.

 

Pour fasilit lizaz sa leksik, bann lareg zeneral nou lortograf ki’n aprouve par Komite Nasyonal Lalang Kreol e ki afekte sirtou lortograf bann mo, i konm swivan :

 

Byensir, anmezir ki nou pe evolye, nouvo konsep, donk nouvo mo pe antre. I posib osi ki in annan omisyon serten mo san ki nou’n annan sa lentansyon. Komite Nasyonal Lalang Kreol pe kontinyen fer resers pour amelyor sa travay akoz sa dokiman i enn ki bezwen kontinyelman ganny met azour pour permet bann itilizater servi en lortograf standar. Donk, nou swete prodwi en siplemanter anmezir ki nou pe prepare pour en  trwazyenm edisyon dan en pli gran lespas letan. Antretan, nou espere ki sa edisyon i a servi tou itilizater Kreol Seselwa byen.

LAREG MO KONPOZE

 

Zeneralman mo konpoze i ekri koman en sel mo. Sepandan kan son bann diferan eleman i otononm dan konteks sa mo, zot ekrir separeman.

 

Legzanp mo konpoze ki ekrir koman en sel mo :

 

·         Movesize - Sa pti baba i movesize.  I                      kontan plere.

 

·         Plennlin – Ler plennlin, lisyen i irle.

 

·         Lezot mo dan sa kategori i bann non plant ek zannimo (lapatlezar, pisarlisyen, trwaleren), ek bann lekspresyon fize (tousatou, atoufer, atoukase, lepokase).

 

En lot kategori se bann mo ki formen avek prepozisyon e ki serten eleman pa otononm :

 

·         Tranblemandter : sa lyezon ‘d’ pa otononm an Kreol Seselwa e ‘ter’ dan konteks ‘later’ pa otononm osi. Oparavan, bann mo konpoze avek prepozisyon ‘d’ (laform kourt ‘de’) ti ekrir koman en sel mo an servan tredinyon : semen-d-fer, koko-d-mer, pwen-d-mark. Aprezan zot senpleman aglitinen : semendfer, kokodmer, pwendmark. Sa i osi aplik pour bann mo konpoze avek prepozisyon ‘de’ ki annan serten konponan ki pa otononm : tab-de-nwi, gel-de-lou, ponm-de-ter i aprezan aglitinen san tredinyon: tabdenwi, geldelou, ponmdeter  (‘nwi’, ‘lou’ ek ‘ter’ pa otononm).

 

Legzanp bann mo konpoze ki son bann diferan eleman i ekrir separeman :

 

·         masin koud, bato lavwal, fil metalik ( 2 mo)

·         fil de fer, lafen di mwan, mal o vant ( 3 mo) *(war 2.0 pour ‘prepozisyon)

·         savat may dan pous, kafe maron pti fey

      (4 mo)

 

LEZOT LAREG

 

Prepozisyon

 

Sa bann eleman swivan i bann prepozisyon ki otononm : a, an, de, di, o, par, le

·         a fler, a karo, an sezon, mal de ler, pla di zour, o profon, par azar…

 

Leksepsyon

I annan bann ka spesyal kot prepozisyon an i aglitinen avek son dezyenm eleman pour form en sel mo akoz sa dezyenm eleman pa otononm. Nou servi doublir ‘n’ osi akoz dan sa bann ka, apard ki i annan en son nazal, ‘n’ i sonnen.

 

·         annor, annarzan, annakor.

 

Dan ka kot dezyenm eleman i otononm, an i azir koman en prepozisyon.

 

·         an aryer, an vites.

 

 

 

Lizaz tredinyon

 

Nou servi tredinyon dan sa bann ka swivan :

 

- letan nou pronons lalyezon :

 

·         kat-r-er, kat-r-an, de-z-er, de-z-an

 

·         Nasyon-z-ini, Leta-z-ini

 

·         Tou le-z-an

 

- letan i annan friksyon konsonn dan  dan mo formen avek prefiks.

 

·         pos-segonder, vis-sekreter…

 

Prefiks

 

Zeneralman prefiks i aglitinen eksepte dan ka ki’n mansyonnen anler.

 

Legzanp lizaz prefiks zeneralman :

·         antikolonyal, antiasid, preistwar, sousef, vistyermenn, kopilot, ekotourizm, biodegradab, posnatal, eks…

 

Aksan 

 

Nou servi aksan selman kan fenomenn nazalizasyon i afekte prononsyasyon e donk 

sinifikasyon.  Dan Kreol Seselwa i annan de aksan :

- Aksan fermen ´   - Aksan ouver `.

 

Legzanp aksan fermen :

·         zón (zón lape).

Dan prononsyasyon, labous i tant pour            pwenti e reste en pe fermen. Se pour sa        rezon ki sa mo i pran en sel ‘n’ a lafen, e sa       ‘n’ i prononse, kontrerman avek zon (en          plant ki pous dan lanmar) kot sa ‘o’ ek ‘n’ i             prodwir en son nazal e donk ‘n’ pa       prononse. Doublir ‘n’ i prodwir en son nazal     e dernyen ‘n’ i prononse: zonn (kouler     zonn).

 

Legzanp aksan ouver :

·         fàn (vantilater)

Dan prononsyasyon, labous i tant pour            reste ouver. Se pour sa rezon ki sa ‘n’ a          lafen sa mo i prononse kontrerman avek         fan (parey dan zanfan) kot sa ‘an’ i en son       nazal e ‘n’ pa prononse. Doublir ‘n’ i     prodwir en son nazal avek en ‘n’ ki            prononse a lafen : fann (fann dibwa).

 

Sif

 

Sif i ekrir koman en sel mo eksepte kan son bann konponan i otononm.

 

·         venteen, trannde, swasant wit, katreven onz

 

Mo avek ‘izm’.

 

Mo ki oparavan ti termin avek ism, leg ; tourism, egoism, i aprezan pran en ‘z’ pour ranplas sa ‘s’ :

 

·         tourizm, egoizm.

Mo ki termin avek  ir / iy

 

- Tou mo ki annan lezot mo derive i termin avek

   ‘iy’.

·         fiy – fiyet,  kokiy – kokiyaz,  apiy -        apiye

 

- Tou mo ki napa lezot mo derive i termin avek

   ‘ir’.

·         fanmir, natir, lantir, grenwir.

 

Dan ka fanmir, i termin avek ir akoz malgre     i annan derive ‘familyal, i annan en      konsonn entervenan avan terminezon.

 

Mo ki termin avek if / iv

 

Zeneralman, bann mo avek terminezon if / iv i aparet dan tou le de laform dan leksik. Par egzanp, agresif / agresiv,  kreatif / kreativ,  egzekitif / egzekitiv…

Sa i akoz lizaz i apepre egal parmi lapopilasyon dan tou le de versyon. Serten mo sepandan i egziste dan zis en laform, par egzanp: adoptif, afektif, me direktiv. Serten egzanpler ki aparet dan tou le de laform i annan en diferans dan sinifikasyon :

 

·         Negatif : en latitid negatif.(Negativ i osi kapab ganny servi dan sa konteks).

 

·         Negativ : negativ portre.

 

·         Eksplosif: en sityasyon eksplozif.

 

·         Eksploziv: dinanmit, eks…

 

 

Lendikasyon bann kategori mo spesyal :

 

(v) = varyan

 

(vilg) = vilger

 

(t) = teknik

 

(mar) = maritim

 

(bot) = botanik

 

(ark) = arkaik

 

 

REMERSIMAN

 

Sa dokiman i en travay Komite Nasyonal Lalang Kreol. Remersiman donk i al pour tou manm sa komite :

 

Marie-Thérèse Choppy

Penda Choppy

Denise Clarisse

Bernadette Dinan

Marvelle Estrale

Erica Fanchette

Elva Gédéon

Marie-Reine Hoareau

Eudoxie Labiche

Christianne Labonté

Sonia Mancienne

Régina Mélanie

Raymonde Onézime

Joelle Perreau

Marie-Thérèse Purvis

Léon Radegonde

Jenny Saminadin

Michel Savy

 

En remersiman spesyal i al pour Colette Gillieaux dabor, pour tou son lernerzi, son legzizans e son vizilans, e pour Annagret Bollée pour son lasistans.  Mansyon spesyal i al osi pour Minister Ledikasyon ki ti konsevwar premye edisyon Leksik e ki’n finans piblikasyon sa dezyenm edisyon.  Finalman, remersiman i al pour tou staf Lenstiti Kreol ki’n ede pour realiz sa travay, e osi pour Minister Lar, Kiltir ek Sport ki’n finans bann travay teknik.                                

Tipografi ek mizanpaz

Colette Gillieaux

 

Kouvertir

Gerald Luc