KWIZ KREOL

Parey in leka pour plizyer lannen, parmi son bann proze edikasyonnel pour koensid avek vennkatriyenm Festival Kreol pour lannen 2009, Lenstiti Kreol ti organiz konpetisyon Kwiz Kreol pour tou lekol segonder lo Mahé, Praslin e La Digue, avek bann lobzektif swivan;

Lobzektif

Ogmant konesans ek lentere lo bann literatir Kreol.

Ankouraz resers lo lalang Kreol.

Ogmant konesans zeneral lo vokabiler Kreol.

Devlop lentere lo kiltir ek listwar Sesel.

Bann sesyon eliminasyon ti demare depi byen boner komansman Zilyet e sa lannen konpetisyon ti ouver pour etidyan nivo S1 ek S2 selman.

Topik ki ti kouver ti enkli:

Literatir ek lalang Kreol

Zedmo, Proverb, lekspresyon Kreol, Mers ek Krwayans lontan

Kiltir, listwar ek konesans zeneral.

Sak sesyon eliminasyon kwiz ti kontyen trwa group wit kestyon baze lo topik ki’n deza mansyonnen, e sesyon final ti kontyen trwa group sez kestyon, touzour baze lo topik ki’n mansyonnen.

Konpetisyon ti fer dan en fason ki tou lekip perdan i otomatikman ganny eliminen e lekip ganyan i kontinyen ziska semi final ek final.  Pour akord en trwazyenm pozisyon, sa de lekip perdan dan semi final ti konteste ansanm.

Pour lannen 2009, ti annan nef lekol ki ti pran par dan konpetisyon Kwiz Kreol e lekol Praslin ti gran ganyan, swivi par lekol Pointe Larue dan dezyenm pozisyon e lekol Mont Fleuri dan trwazyenm pozisyon.  Ti osi annan pri pour meyer skorer dan sesyon eliminasyon e sa pri ti ranporte par Michel both sorti lekol Mont Fleuri e pour final sa pri ti ranporte par Paul Gedeon sorti lekol Pointe Larue.

Koman pri, ti annan bann pri larzan, bann lo liv, dinen ofer par bann diferan lotel e ekskirsyon ofer par diferan Lazans Voyaz.

KONKOUR DISKOUR

Konkour Diskour an Kreol i en lot aktivite edikasyonnel e kiltirel ki Lenstiti Kreol ti organize pour mark vennkatriyenm Festival Kreol pour lannen 2009.

Sa konkour ti donn sans bann partisipan pour fer serten resers lo nou lalang, pour en bon prezantasyon dan langaz korek ek bann diferan domenn ki tous depi lavi tou le zour ziska topik pli entelektyel. Sa ki Lenstiti Kreol ti pe espere gannyen alafen se ankor en pti pa ver devlopman Kreol formel ki’n itiliz byen non selman repertwar mo ki deza dan lizaz tou le zour me osi en leksplwatasyon bann term ek lekspresyon pli teknik, an gardan klarte largiman parey dan nenport Konkour Diskour ki fer an Angle ouswa an Franse.

Lobzektif sa konpetisyon sete;

Pour devlop fason koze ek fasilite lekspresyon

Pour devlop teknik pour kominikasyon ek koze devan en lodyans

Pour devlop konfyans ek personnalite.

Sa lannen Lenstiti Kreol ti ganny partisipasyon wit lekol pour sa konkour e sa konkour ti annan en staz eliminatwar kot en bord trwa manm ziri ki bezwen swazir le trwa meyer pour gran final.

Sa konpetisyon ti ouver pour tou etidyan segonder e sak lekol ti bezwen prezant en lekip trwa dimoun, e koz lo en topik zot swa pour 15 minit.  Apre kwa zot ti bezwen reponn kestyon bann manm ziri.  Lenstiti Kreol pa ti servi menm ziri pour final donk sa bann ziri ki ti ziz final pa ti’n deza tann sa bann prezantasyon.

Dan final topik ki ti prezante ti “Telefonn portab” par lekol La Digue, “Responsabilite”par lekol Praslin e “Valoriz tou nou ladans kiltirel” par lekol Anse Boileau.

Lekol Praslin ti sorti venker, swivi par lekol La Digue dan dezyenm pozisyon e lekol Anse Boileau dan trwazyenm pozisyon.  Ti osi annan pri pour meyer prezantater, meyer kozer prensipal e meyer lokiter e lekol Praslin ti pran tou le trwa sa pri.

Pri pour sa Konkour ti enkli bann pri larzan, bann lo liv, dinen ofer par bann diferan lotel e ekskirsyon ofer par diferan Lazans Voyaz.